·
2021年8月，遊沐再度與PMQ Seed 合作，舉辦了一連9日的「GREEN & ME 童理·大自然 小小夏令營」。整個活動共有93個家庭參與（包括109位家長及111位小朋友）。在遊沐資深導師帶領下，家長與小朋友進行不同嘅親子自然體驗活動。為配合「同理心」主題，遊沐團隊更在是次活動加入設計思維（Design Thinking）的元素，以全新的方式，讓孩子化身小記者，運用同理心及創意，訪問一種動植物，從而讓家長及孩子們學習從動植物的角度，觀察及了解他們的處境，親身體驗如何同理他人與自然。
小朋友分享：
「今日見到好鍾意嘅粉紅色嘅葉，所以好開心」
「好開心，因為可以訪問大樹 」
「好嬲呀！ 因爲有人釘咗粒釘落卜公花園棵樹度。」
「開心，我哋去咗搵啲樹，嗰棵樹大過一架巴士！」
家長分享：
「今日可以發掘到囡囡另一面，原來佢嘅好奇心同觀察力比我想像中強，原來小朋友無玩具，都可以同大自然玩，同大自然做朋友，希望日後有更多時間同囡囡一齊發掘大自然。」
「好開心，因為平時好少有機會去同小朋友分享自己嘅感受同情緒，但今次可以透過大自然互相交流感受，更加發現原來大自然都有佢哋嘅感受」「今日係一個好好嘅機會，小朋友親身行出公園學習同理心呢樣嘢，自己都諗返平時我哋好多時行路都好急，原本身邊好多好靚嘅嘢都忽略咗， 其實有時我哋日常可以放慢啲腳步去諗下週圍嘅嘢，有時小朋友觀察到，想睇想問，但係大人會比較心急……」